Ubuntu Cymraeg

Ymestyn y defnydd o Rhythmbox

ubuntucymraeg — Sat, 22 May 2010 14:33:46 +0000

Mae modd defnyddio ategion (plugins) i newid golwg Rhythmbox a’r ffordd rwyt ti’n chware cerddoriaeth ar gyfrifiadur Ubuntu. Ceir rhestr o ategion swyddogol a sut i’w sefydlu ar y dudalen berthnasol o wefan Rhythmbox. Mae modd i ti hefyd lwytho rhai answyddogol sy’n cael eu datblygu drwy Gnome Live.

Yn yr enghraifft hon byddaf yn sefydlu dau answyddogol, un i lwytho delweddau o gloriau cds, a’r llall i ddangos ar dy fwrdd gwaith pa gân sy’n chwarae.

Cyn dechrau mae angen llwytho subversion (svn) i hwyluso’r broses sefydlu - pecyn sy’n werth ei gael ar dy system beth bynnag. Agor terfynell a chopio a gludo’r cod canlynol cyn pwyso Enter, sudo apt-get install subversion, a thra bod ti wrthi cer ati i greu plygell i ddal yr ychwanegiadau newydd gyda mkdir -p $HOME/.gnome2/rhythmbox/plugins/ ac Enter.

Sefydlu Desktop Art

Mae Desktop Art yn dangos ar y bwrdd gwaith pa gân sy’n chwarae, gyda delwedd o glawr y cd os wyt ti wedi llwytho un.

I lwytho hwn agor terfynell a chopio a gludo’r cod isod un llinell ar y tro, gan wasgu Enter bob tro.

cd $HOME/.gnome2/rhythmbox/plugins/ i symud i’r blygell iawn

svn co http://nedrebo.org/svn/rhythmbox/desktop-art i lwytho’r meddalwedd

Sefydlu Album Art Search

Mae Album Art Search yn rhan o Google Code, ac fel mae’r enw’n awgrymu mae’n chwilio am gloriau cds.

Dilyn y cyfarwyddiadau ar dudalen Album Art Search i’w sefydlu. I’w alluogi cer i Golygu -> Plugins yn Rhythmbox, a rhoi tic yn y blwch wrth ei enw.

Bydd angen cau ac ailgychwyn Rhythmbox cyn bod yr un o’r ddau uchod yn gweithio.

Desktop Art ar waith yn Ubuntu 10.04

Defnyddio Gmail gydag Ubuntu 10.04

ubuntucymraeg — Sun, 16 May 2010 19:05:46 +0000

Evolution yw meddalwedd ebost diofyn Ubuntu 10.04, ac mae wedi ei adeiladu’n rhan o’r system. Er enghraifft mae ardal arddangos yn y bar top sy’n cynnwys pethau fel Pidgin ar gyfer sgyrsio, rheolwr cyfrifon darlledu fel Identi.ca, Facebook a Twitter, ac ardal sy’n dynodi pan fod ebost newydd yn cyrraedd Evolution. Dyw hyn ddim yn gyfleus i bawb, ac i’r sawl sy’n defnyddio Gmail fel prif gyfri ebost ac sydd ddim eisiau defnyddio Evolution fel cleient, dyma sut mae ei newid. Byddwn yn sefydlu gm-notify ac yn tynnu’r man arddangos sy’n rhan o Evolution.

Agor terfynell a chopio a gludo’r cod isod un llinell ar y tro, gan wasgu Enter bob tro. Bydd yn rhaid cyflwyno cyfrinair ar ôl yr un cyntaf:

sudo add-apt-repository ppa:gm-notify-maintainers/ppa i ychwanegu cronfa meddalwedd gm-notify:

sudo apt-get update i ddiweddaru’r system a’r cronfeydd meddalwedd:

sudo apt-get install gm-notify i sefydlu gm-notify:

sudo apt-get remove evolution-indicator i gael gwared o’r amlen sy’n dynodi ebost newydd i Evolution.

Bydd angen allgofnodi a mewngofnodi eto i’r newidiadau ddod yn weithredol, a gallu di fynd i System -> Hoffterau -> Gmail Notifier Configuration i ychwanegu dy gyfri Gmail. Cofia roi tic yn y blwch dan y tab Enhanced i nodi dy fod eisau iddo gychwyn gyda dy system.

Ubuntu 10.04: gm-notify ar waith

Cerddoriaeth yn Ubuntu 10.04

ubuntucymraeg — Sat, 15 May 2010 15:56:52 +0000

Mae’r ffordd mae defnyddwyr Ubuntu yn gallu chwarae, rheoli a phrynu cerddoriaeth wedi newid yn fawr iawn gyda lansio Ubuntu 10.04. O reoli iPod neu iPod Touch, i brynu cerddoriaeth o siop Ubuntu, mae modd gwneud y cyfan nawr drwy Rhythmbox, prif feddalwedd trefnu a chwarae cerddoriaeth penbwrdd GNOME.

Chwarae a threfnu cerddoriaeth

Mae Rhythmbox yn cynnig ffordd hawdd i ti drefnu dy gerddoriaeth a’i chwarae ar gyfrifiadur Ubuntu. Gan ei fod yn defnyddio Gstreamer mae modd chwarae ystod eang o fformatau, ac mae degau o estyniadau wedi cael eu datblygu ar ei gyfer. Mae Rhythmbox yn dy alluogi i:

Chwarae cerddoriaeth o bob math
Chwilio dy gasgliad cerddoriaeth
Chwarae ffrydiau radio gwe
Trefnu rhestrau chwarae
Trosglwyddo cerddoriaeth i chwaraewyr cerddoriaeth USB ac iPod
Dangos geiriau caneuon a chloriau albwm
Chwarae, rhwygo a llosgi cds sain
Llwytho podlediadau yn awtomatig
Chwilio, gwrando ar, a llwytho cerddoriaeth o nifer o wefannau

Rheoli Cerddoriaeth drwy Rhythmbox

Cefnogaeth i’r iPod a’r iPod Touch

Am y tro cyntaf erioed mae Ubuntu’n cynnig cefnogaeth i’r iPod heb orfod addasu dy system o gwbwl. Er bod Apple yn gwrthod creu fersiwn Linux o iTunes, ac er eu bod yn gwrthod rhyddhau digon o’r côd i alluogi cymuned Linux i wneud y gwaith, mae rhaglennu-am-yn-ôl a gwaith caled cymuned Ubuntu yn golygu bod Rhythmbox ar Ubuntu 10.04 yn gallu rheoli’r iPod a’r iPod Touch.

Rheoli'r iPod Touch drwy Rhythmbox ar Ubuntu 10.04

Prynu arlein o siop gerddoriaeth Ubuntu

Ymdrech arall i danseilio cyn fonopoli iTunes ar y farchnad gerddoriaeth arlein yw siop gerddoriaeth Ubuntu. Er bod meddalwedd eisoes ar gael i lwytho cerddoriaeth o Siop MP3 Amazon, mae rhai manteision o ddefnyddio siop Ubuntu. Nid yn unig bod casgliad Ubuntu yn fawr ac yn dal i dyfu, ond mae hefyd modd gwneud popeth drwy Rhythmbox.

Mae un copi o unrhyw gerddoriaeth rwyt ti’n prynu’n cael ei lwytho i dy gyfrifiadur drwy Rhythmbox, ac un arall yn cael ei gadw ar dy gwmwl Ubuntu One. Mae ar gael i ti felly ble bynnag mae gen ti gysylltiad gwe a chyfrifiadur sy’n gallu chware MP3.

Siop Gerddoriaeth Ubuntu

Ubuntu One: rhannu ffeiliau drwy’r cwmwl

ubuntucymraeg — Thu, 06 May 2010 17:34:09 +0000

Un o’r elfennau newydd i gael ei weithredu’n llawn yn Ubuntu 10.04 yw’r gallu i rannu ffeiliau drwy’r cwmwl. Mae Ubuntu One yn cynnig gwasanaeth cwmwl personol i bob defnyddiwr, a 2 GB o ofod storio yn rhad ac am ddim. Drwy Ubuntu One mae modd cyfamseru (syncio) ffeiliau, nodiadau, lluniau llyfrnodau a llawer mwy. Dim ond porwr gwe sydd angen i gael mynediad at y ffeiliau hyn o rywle. Mae modd sefydlu a ffurfweddu Gosodiadau Ubuntu One ar unrhyw gyfrifiadur Ubuntu.

Ubuntu One | Nodweddion Ubuntu One yn llawn.

Gosodiadau Ubuntu One

Cyfamseru Ffeiliau ar Ubuntu One

Gwefan Ubuntu One

Ubuntu 10.04

ubuntucymraeg — Sat, 01 May 2010 11:01:14 +0000

Mae’r fersiwn diweddaraf o Ubuntu wedi cael ei ryddhau. Mae’n cynnig cefnogaeth tymor hir, brand newydd, a llawer o nodweddion eraill.

Mwy o wybodaeth | Uwchraddio o fersiwn blaenorol | Llwytho Ubuntu 10.04 | Llwytho Ubuntu 10.04 ar gyfer gliniadur bach

Gwneud copi wrth gefn gyda Grsync

ubuntucymraeg — Fri, 02 Apr 2010 17:50:05 +0000

Mae’n werth i bawb sy’n defnyddio Ubuntu neu unrhyw system weithredu arall gael copi wrth gefn o ffeiliau pwysig. Un o’r rhaglenni mwyaf uchel ei pharch ar Linux ar gyfer cyflawni’r gwaith yw Rsync. Gan mai rhaglen sy’n cael ei rheoli gan y terfynell yw Rsync ac nad yw hyn at ddant pawb, mae datblygwyr wedi creu rhyngwyneb graffegol ar ei chyfer o’r enw Grsync. Mae modd llwytho’r ddau drwy’r Rheolwr Pecynnau Synaptic yn Ubuntu.

Unwaith i ti lwytho Grsync mae modd ei redeg drwy fynd i Rhaglenni -> Offer System -> Grsync. Mae’r sgrin sy’n agor yn cynnig nifer o ddewisiadau gwahanol, ac mae’r rhan fwyaf o’r rhain yn esbonio’u hunain. Os nag wyt ti’n siwr, dal y llygoden uwchlaw’r dewisiadau ac fe fydd yn rhoi mwy o wybodaeth i ti. Os wyt ti’n dal ddim yn siwr, mae mwy o wybodaeth ar wefan Grsync.

Efallai bod hyn yn swnio’n amlwg ond mae wastad yn werth cadw copi o ffeiliau pwysig ar gof allanol neu wahanol, rhag ofn i ti golli gwaith oherwydd bod caledwedd yn methu.

Gwneud copi wrth gefn gyda Grsync

Rhwygo CD ar Ubuntu

ubuntucymraeg — Sat, 20 Mar 2010 13:42:29 +0000

Y meddalwedd diofyn i rwygo cerddoriaeth ar benbwrdd Gnome yw Sound Juicer. Mae’n defnyddio technoleg rhwygo cds CD Paranoia, ac fel rheol bydd wedi ei sefydlu’n barod ar dy system Ubuntu. Mae modd ei lansio drwy fynd i Rhaglenni -> Sain a Fideo -> Audio CD Extractor. Os nag wyt ti’n gallu cael hyd iddo, llwytha Sound Juicer drwy’r Rheolwr Pecynnau Synaptic. Fel gyda rhaglenni diofyn eraill Gnome, mae’r rhan fwyaf o’r rhyngwyneb ar gael yn y Gymraeg.

Wedi i ti roi’r cd i mewn a lansio Sound Juicer fe fydd yn dangos cynnwys y cd i ti. Mae modd newid y fformatau rhwygo drwy fynd i Golygu -> Preferences. Os wyt ti’n bwriadu trosglwyddo’r gerddoriaeth i iPod neu ddyfais debyg, newid y Ffurf Allbwn o dan Fformat i CD Quality, MP3 (.mp3 type). Os wyt ti’n bwriadu ei chwarae ar dy gyfrifiadur Ubuntu newid y dewis i CD Quality, Lossless (.flac type) neu CD Quality, Lossy (.ogg type). Mae’n llawer gwell defnyddio .ogg neu .flac os wyt ti’n gallu gan fod safon y sain yn well.

Dewisiadau Sound Juicer

Rhwygo CD i MP3 gyda Sound Juicer

Cyfarwyddiadau Sound Juicer | CD Paranoia | Fformat ogg | Fformat MP3

Cylchgrawn Ubuntu yn rhad ac am ddim

ubuntucymraeg — Sun, 14 Mar 2010 14:14:04 +0000

Gwefan Full Circle Magazine | Llwytho ôl rifynnau (33 ohonyn nhw) | Podlediad

Cyhoeddi Penbwrdd yn Linux

ubuntucymraeg — Sun, 14 Mar 2010 12:49:56 +0000

Mae rhaglen Scribus yn feddalwedd côd agored pwerus sydd wedi cael ei ddatblygu’n drwm yn ystod y blynyddoedd diwethaf. Mae’n cynnig opsiwn rhad ac am ddim i’r sawl sydd eisiau creu dogfennau o safon broffesiynol i’w cyhoeddi, ac yn gweithio ar gyfrifiaduron Linux, Mac neu Windows.

Mae modd llwytho Scribus yn hawdd drwy’r Rheolwr Pecynnau Synaptic, a’i redeg ar Ubuntu drwy fynd i Rhaglenni -> Graffeg -> Scribus.

Mae tiwtorial i ddechreuwyr ar gael ar wiki Scribus, ac i’r sawl sy’n gweithio yn y maes mae llawlyfr swyddogol Scribus yn werth pob ceiniog. Mae’r rhan fwyaf o ryngwyneb Scribus yn Gymraeg.

Sgrînluniau

Tudalen gyntaf Scribus

Templedi (Patrymluniau) Scribus

Un o dempledi Scribus ar waith

Golygu fideo ar Ubuntu a systemau Linux eraill

ubuntucymraeg — Sun, 21 Feb 2010 14:52:39 +0000

Un peth sydd wedi bod yn anodd iawn wrth ddefnyddio Linux yn y gorffennol yw cael hyd i olygydd fideo o safon. Mae rhaglenni fel Cinelerra a Kino wedi bod ar gael ers amser, ac mae cryfderau a gwendidau i’r rhain. Serch hynny, mae dwy raglen sydd wedi cael eu datblygu’n frwd yn ddiweddar, sef PiTiVi a Kdenlive.

Kdenlive

Os wyt ti’n chwilio am olygydd fideo pwerus gyda llawer o nodweddion sy’n medru cystadlu gyda rhaglenni fel iMovie ac Adobe Premiere Pro, mae’n werth rhoi cynnig ar Kdenlive.

Sefydlu Kdenlive

Mae modd sefydlu Kdenlive drwy ychwanegu cronfa feddalwedd newydd ac ail-lwytho Synaptic. I wneud hyn ar Ubuntu 9.10 dilyn y cyfarwyddiadau isod. Mae mwy o gyfarwyddiadau ar gyfer systemau eraill ar wefan Kdenlive.

Cer i System-> Gweinyddiaeth -> Software Sources, cyflwyna dy gyfrinair, rho glec i’r tab Other Software, clec i Add, a gluda ppa:sunab/ppa yn y blwch, ei gau, ac ail-lwytho pan fydd yn gofyn i ti wneud. Agor y Rheolwr Pecynnau Synaptic, chwilia am Kdenlive a rhoi clec iddo. Bydd Synaptic yn gofyn i ti lwytho meddalwedd arall gyda’r rhaglen a rho glec i iawn wrth ei sefydlu.

Defnyddio Kdenlive

Bydd lansiwr ar gyfer Kdenlive yn ymddangos dan Rhaglenni-> Sain a Fideo. Gair o rybudd. Mae Kdenlive yn rhaglen bwerus, llawn nodweddion sy’n defnyddio FFmpeg i drin a thrafod pob math o ffeiliau sain a fideo, os wyt ti’n gallu ei gael i weithio.

Mae’n bwysig cofio mai Kdenlive 0.7.7 yw’r un diweddaraf, a’i fod yn gwella drwy’r amser, ond os nag wyt ti’n lwcus iawn bydd angen bach o amynedd, gwaith a gwglo cyn bod y rhaglen yn rhedeg yn iawn a ddim yn chwalu. I gael Kdenlive i weithio’n iawn ar fy system i bu’n rhaid addasu dipyn ar y gosodiadau, a chreu lansiwr oedd yn defnyddio gorchymyn env XLIB_SKIP_ARGB_VISUALS=1 kdenlive yn hytrach na lansio’r rhaglen drwy’r gorchymyn arferol, sef kdenlive.

PiTiVi

Cyn dechrau, yr ynganiad o ddarllen yn y Gymraeg yw pai ti fi. Cafwyd datblygu mawr ar PiTiVi yn ddiweddar, gyda chwmni preifat yn noddi pobl i weithio’n llawn amser ar y rhaglen. Mae PiTiVi wedi ei adeiladu ar fframwaith gstreamer, ac mae’n rhaglen gwbwl sefydlog.

Sefydlu PiTiVi

Mae modd ei sefydlu’n hawdd iawn drwy’r Rheolwr Pecynnau Synaptic. Bydd Synaptic yn gofyn i ti lwytho meddalwedd arall gyda’r rhaglen a rho glec i iawn wrth ei sefydlu.

Defnyddio PiTiVi

Bydd lansiwr ar gyfer PiTiVi yn ymddangos dan Rhaglenni-> Sain a Fideo. Gair o rybudd. Fersiwn 0.13.3 yw’r un diweddaraf, ac er bod PiTiVi yn sefydlog a hawdd ei ddefnyddio does dim llawer o nodweddion iddo eto. Gyda’r datblygu trwm mae’n siwr y bydd PiTiVi yn dod yn olygydd fideo poblogaidd iawn yn y dyfodol, ond does dim modd ei ddefnyddio ar hyn o bryd i gyflawni dim byd heblaw am dasgau syml iawn.

Dyma rai rhaglenni eraill i olygu fideo ar Linux sy’n werth cofio amdanyn nhw:

Cinelerra

Mae Cinelerra wedi bod ar gael ers amser, ac mae’n werth rhoi cynnig ar hwn yn ôl y rhai sy’n ei greu: “If you want the same kind of editing suite that the big boys use, on an efficient UNIX operating system, it’s time for Cinelerra.”

Kino

Rhaglen elfennol i olygu DV. Handi iawn i gael ar dy system ar gyfer trosglwyddo ffilm o gamera fideo.

Kdenlive | PiTiVi | Cinelerra | Kino | Gwybodaeth ar Fforwm Ubuntu

Golygu fideo gyda Kdenlive

Golygu fideo gyda PiTiVi